MANOHAR KAHANIYAAN

Aaj kal jo bhi dekhne ka mann karta hain

dekh lete hain badi asaani se

Online stream ho gayi hain kahaniyaan

4G ki meherbaani se

ab kuch dekhne ki bebasi ho,

toh use offload ker liya karte hain

humein jo dekhne ka waqt na ho,

use download kar liya karte hain

par in saari sahuliyat se door

ek aisa daur bhi hua karta tha

jab internet ko dekhne ka maza kuch or hi hua karta tha

ye woh daur tha jab kitaabon ke aakhri panne per

'loves me ,loves me not' likh ker parakh liya karte the

aur Doordarshan ki aad mein,

fashion TV dekh liya karte the

Tab,

web series mein ulajhe hi nhin the

Human biology samajhe nhin the

jab desi masala ka jaadu

online ki duniya mein bika hi nahin tha

jab badmashiyaan sikhane waala

Naughty amrika bhi nahi tha

Tab le jaate kuch CDs ko lapet kar

akhbaar mein doston ki demand par

aur mil jaati thi kuch kahaniyaan kitaabon ki shakl mein

railway stall ya bus stand par

jinhe padh kar daudti thi nas nas mein ravaniyaan

jinke kahaniyon mein suspense aur title mein hairaniyan

jinke panno mein qaid hain

ladakpan ki nishaniyaan

yeh netflix wali janta kya hi samajh payegi

dil pe kya keher dhaati thi manohar kahaniyaan

Mujhe aaj bhi yaad hain

New Dehli station ka von manzar

kaanp rahe the jism 4 sweateron ke andar

Waiting room se toh bas pariyaan nikal rahin thi

mujhe lag raha tha ke unmein se koi thi jo mujhe dekh rahin thi

khair padhne ke liye uss din ki khabrein

pahunch gya railway stall ke paas

aur achanak se chodharyji ne kitaab pakda kar mujhe kaha

"beta ise padhna. Ise padhke milega

sardiyon mein garmiyon ka ehsaas."

kya hain ki unko lag raha tha ki

unhone kisi batke hue naujawan ka mann rakha tha

mere keel munhase bata rahe the ki

mene abhi abhi jawani ki dehleez par kadam rakha tha

 Chodharyji ne samjhaya

ki achche logon ke vichaar toh

Iss kitaab ke saanche mein dhalte nahin hain

Aur jo Manohar Kahaniyaan padhte hain woh

bahut der tak baathroom se nikalte nahin hain

bas, phir kya tha

sweater ki aad mein humne bheed se kattna shuru kiya

Waiting room ke baathroom mein

baithkar jab panne palatna shuru kiya.....toh Offo!

Kya kya kahaniyaan thi

kaun mehfil mein aisi baatein bole

pehli hi kahani ka shirshak tha

'kya hota hain jab jawaan dewar bhabhi ki gaanthein khole'

kya hain na ki tab mujhe pata chala ki kis tarah se title hi de kar

pdhne waale ko shock kiya jaata hain

Bhabhi nahin, koi password hain jisse unlock kiya jaata hain

Aisi kahaniyaan jinko padh kar

 soya raat bhar nahin tha

Agli kahani naukar ne likhi thi

'uss raat jab maalik ghar par nahin the'

jab maalkin ne mohan se kaha ki

"Ab na humein bebas karo"

Aur ghadi ke kaante keh rahe the

"Hadh ho gayi KUMAR bas karo"

kyunki December ke mahine mein

jaise mann ko geela saawan mila

Agli kahani thi jab

"Sonam ko naya saajn mila"

Har dusre panne pe aawaaz thi

uff! ayr Aah! ki

par darwaze se koi andar na aa jaye

darwaze par nigaah thi

jab mujhe laga ki ufaan pe

dilon mein jazbaaton ke bawandar aa gaye

tab achanak darwaza khula

aur papa andar aa gaye

Tab aisa laga ki kisi gumshuda hotel per

jaise police ki dhaad padi

Zindgi bhar yaad rahegi

belt, joote aur thappad se mujhe itni maar padi

Phir toh main aise baahar nikla jaise thappad toh door

ki baat kisi ne mujhe chhua tak nahi tha

Hawas ki nigaahon pe sharafat ka chashma pehna

jaise kuch hua hi nahi tha

par papa nazar nahin aa rahe the

bheed se nadaarad the

jisse main pandit samajh baitha tha

woh toh kisi aur hi kala mein vishaarad tha

yaani ki ab tak jo sanskaaron ka hawala de kar

 mujhse ladd rahe tha

wohi 12(bhaarvi) pareeksha ki kitaab ki aad mein

manohar ki kahani padh raha tha

jab unhein laga ki munsif khud

kathghare mein ghir chuka hain

Tab sakpakaate hue bole ki

"main toh yeh dekh raha tha ki tu

kis hadh tak neeche gir chuka hain"

mujhe laga ki kudrat ne

karmon ke phal wala insaaf kiya

papa se mene kuch nhin kha

Dil hi dil ke andar maaf kiya

mujhe laga ki agar papa, aur hum sab ke papa

agar aisi kitaabon se rishta nibhate nahin

toh main aur mujh jaise kayi dost

waqt par duniya mein aate nahi

khair, aise mein yaatrigan ki duaaein

apna hi asar la gayin

achanak se 'Aravli Express' bhi platform 3 par aa gayi

Saari pariyaan waiting list room se nikal kar

seedhe mere hi dabbe mein agayi

Uske baad jo saamne waali sheet per baithi

toh kya nazaara tha huzoor

Usne dabi waaz mein kaha

"Aakhri kahani kaafi dilchasp hain, padhiyega zaroor."

kaafi difficult, kaafi asaan

Toh kabhi easy hoti hain

kaviyon ki kahani mein masala hota hain

kahani kaafi cheesy hoti hain

Har roz humein mil jaati hain zindagi mein aisi hairaniyaan

aur kabhi cheesy story sunne ka mann kare na

toh railway stall jaa kar padh lena

Manohar Kahaniyaan.